Karadzic segist eiga skilin verðlaun frekar en refsingu

Radovan Karadzic, fyrrverandi leiðtogi Bosníu-Serba, lýsir yfir sakleysi sínu. Hann hóf í gær málsvörn sína fyrir stríðsglæpadómstól í Haag. Hann sætir ákærum fyrir stríðsglæpi, þjóðarmorð og glæpi gegn mannkyni.

„Í staðinn fyrir að vera ásakaður fyrir atburði í stríði okkar, þá ætti ég að fá verðlaun fyrir allt það góða sem ég hef gert,“ sagði Radovan Karadzic, fyrrverandi leiðtogi Bosníu-Serba, þegar hann hóf málsvörn sína fyrir stríðsglæpadómstól í Hollandi.

„Allir sem þekkja mig vita að ég er enginn einvaldur, ég er ekki árásargjarn, ég er ekki óbilgjarn,“ sagði Karadzic. „Þvert á móti er ég mildur maður, umburðarlyndur og hef mikla hæfileika til að sýna öðrum skilning.“

Karadzic er meðal annars ákærður fyrir þjóðarmorð og glæpi gegn mannkyni. Hann er sagður hafa skipulagt ofsóknarherferðir gegn múslímum og Króötum í Bosníu allt frá árinu 1992 til ársins 1995, þegar ofsóknirnar náðu hámarki í fjöldamorðunum í Srebrenica.

Karadzic sagðist saklaus af öllu þessu: „Ég gerði allt sem í mannlegu valdi stendur til þess að koma í veg fyrir stríðið,“ sagði hann. „Mér tókst að draga úr þjáningum almennings.“

Hann fékk níutíu mínútur til að verja gerðir sínar í gær áður en réttarhöldin héldu áfram. Hann virtist afslappaður og brosti óspart.

Meðal annars fullyrti hann að sum af verstu voðaverkum Bosníu-stríðsins hefðu skipulögð af öðrum en Serbum, og þá í þeim tilgangi að snúa áliti almennings gegn Serbum. Þetta segir hann meðal annars hafa átt við um tvær sprengjuárásir á markaðstorgið í Sarajevó árið 1994 og 1995.

Hann sagðist unna borginni Sarajevó og að allar árásir á borgina hefðu sært sig illa. Fyrri sprengjuárásina sagði hann „útfærða af algjöru samviskuleysi“.

„Auðvitað dó fólk í þeirri sprengingu en við sáum líka að gínum var fleygt á vöruflutningabíla til að búa til þessa sýningu handa umheiminum,“ sagði Karadzic í gær.gudsteinn@frettabladid.is