Engin stimpilgjöld við skipti á banka

Nefnd vinnur að frumvarpsdrögum sem eiga að draga úr kostnaði við flutning viðskipta á milli lánardrottna. Önnur nefnd á að endurskoða neytendavernd á íslenskum fjármálamarkaði. Hún skilar skýrslu í síðasta lagi 15. janúar 2013.

Íslensk stjórnvöld hafa skuldbundið sig til að endurskoða lög um stimpilgjöld með það fyrir augum að afnema slík gjöld á útgáfu skuldabréfa einstaklinga þegar skipt er um kröfuhafa. Starfshópur sem hefur verið skipaður á að skila af sér frumvarpsdrögum um málið í október. Þetta er meðal þess sem kemur fram í ákvörðun Eftirlitsstofnunar EFTA (ESA) um samþykkt á ríkisaðstoð við nýju bankana þrjá, Landsbanka, Íslandsbanka og Arion banka, þegar þeir voru fjármagnaðir. Í ákvörðun ESA segir einnig að starfshópurinn eigi einnig að kanna hvernig álagningu stimpilgjalda megi breyta til að einfalda ferlið og ýta undir samkeppni á meðal fjármálafyrirtækja.

Lög um stimpilgjöld voru sett 1978. Samkvæmt þeim greiða allir sem kaupa sér fasteign 0,4 prósent af fasteignamati hennar í stimpilgjald til ríkissjóðs. Þeir sem eru að kaupa sína fyrstu fasteign eru undanþegnir gjaldinu. Af vanalegum veðskuldabréfum eru greidd 1,5 prósent af fjárhæð bréfsins. Ef skuldari ætlar að færa skuldir sínar yfir til annars fjármálafyrirtækis, sem býður mögulega betri kjör, þá þarf hann að greiða stimpilgjöld af nýju fjármögnuninni. Þau gera það oft að verkum að flutningurinn verður óhagkvæmur og gjöldin virka því sem samkeppnishindrun.

Í júní síðastliðnum tilkynnti ESA um þá ákvörðun sína að samþykkja þá ríkisaðstoð sem veitt var við endurskipulagningu á nýju viðskiptabönkunum þremur. Þar kom fram að stjórnvöld og bankarnir sjálfir þyrftu að grípa til fullnægjandi ráðstafana til að draga úr röskun á samkeppni vegna tilurðar þeirra. Jafnframt segir að íslensk stjórnvöld hafi skuldbundið sig til að endurskoða lög um stimpilgjald með tilliti til þess að draga úr kostnaði við flutning viðskipta á milli lánardrottna. Í öðru lagi eigi stjórnvöld að skipa nefnd sem á að endurskoða neytendavernd á íslenskum fjármálamarkaði og leggja fram tillögur um hvernig staða einstaklinga og heimila gagnvart fjármálafyrirtækjum getur verið styrkt. Nefndin á sérstaklega að fjalla um að auðvelda viðskiptavinum fjármálafyrirtækja að skipta um viðskiptabanka. thordur@frettabladid.is