Þjófarnir klónuðu stolna bíla

Lögregluyfirvöld í Danmörku og Póllandi hafa afhjúpað pólskt þjófagengi sem stolið hefur að minnsta kosti 40 dýrum bílum í Danmörku.

Stolnum bílum var ekið til Póllands þar sem þeir voru „klónaðir“, að því er haft er eftir dönsku lögreglunni á fréttavef Jyllands-Posten. Þjófarnir fjarlægðu gamla kenninúmerið á grindinni og settu á nýtt auk þess sem sett var ný stýrislæsing í bílana og nýr kveikilás.

Í janúar á þessu ári stöðvaði lögreglan á Jótlandi tvo Pólverja á bíl með pólskum númeraplötum. Lögreglan komst að því að bíllinn hefði verið „klónaður“ og í framhaldinu hófst samvinna við pólsk lögregluyfirvöld. Aðalbækistöðvar þjófagengisins reyndust vera í bæ á landsbyggðinni fjarri stórum borgum.

Lögreglan fann ekki bara stolna bíla heldur einnig mikið magn varahluta og dýrra verkfæra.

Fjöldi Pólverja hefur verið dæmdur vegna málsins. Sá sem talinn er vera höfuðpaurinn kemur fyrir rétt í Danmörku nú í september. Skömmu eftir að þjófagengið var afhjúpað fækkaði stuldum á lúxusbílum og bílum handverksmanna verulega. Lögreglan bendir á að í þessum bransa komi hins vegar alltaf ný gengi. - ibs