Viðbúnaður aukinn vegna árása í Líbíu

Teknar voru upp auknar öryggisráðstafanir við sendiráð og sendiskrifstofur Bandaríkjanna um heim allan í gær. Viðbúnaðurinn er vegna árásanna á sendiráð Bandaríkjanna í Líbíu þar sem meðal annars voru drepnir sendiherra Bandaríkjanna og þrír bandarískir sendiráðsstarfsmenn.

Haft var eftir ónefndum yfirmanni öryggismála hjá bandarískum stjórnvöldum í gær að árásirnar á miðvikudag hefðu verið þaulskipulagðar og framkvæmdar af þungvopnuðum skæruliðum. Annars vegar hefði verið ráðist á sjálft sendiráðið og hins vegar á athvarf sem átti að vera leynilegt, í þann mund sem líbíska og bandaríska hermenn bar að til að aðstoða starfsfólk sem flúið hafði sendiráðið.

Wanis al-Sharef, aðstoðarinnanríkisráðherra í Austur-Líbíu, sagði í gær að grunur léki á að árásirnar hefðu verið í tilefni af því að ellefu ár væru liðin frá árásunum á Bandaríkin 11. september og að þeir sem að árásinni stóðu hefðu skákað í skjóli óbreyttra borgara sem saman voru komnir við sendiráðið til að mótmæla bandarískri óhróðurskvikmynd um íslamska trú.

Auk Chris Stevens sendiherra og hinna Bandaríkjamannanna sem létust, þá særðust um 30, bæði Líbanir og Bandaríkjamenn, í árásunum.

Þá upplýsti Eric Holder, dómsmálaráðherra Bandaríkjanna, í gær að bandaríska alríkislögreglan (FBI) hefði hafið rannsókn á dauða Bandaríkjamannanna sem létust í árásunum í Bengasí. Hann sagði bandarísk stjórnvöld vinna náið með stjórnvöldum í Líbíu að rannsókn málsins.

Mótmæli vegna óhróðursmyndarinnar bandarísku, sem nefnist „Innocence of Muslims“ og var birt á netinu, héldu hins vegar áfram víða um heim. Mohammed Morsi, forseti Egyptalands, lýsti því hins vegar yfir í gær að ekki yrðu heimilaðar neinar árásir á erlend sendiráð í Kaíró og kvað egypska þjóð hafna „ólögmætum aðgerðum“ sem slíkum. Morsi sagði í yfirstandandi heimsókn í höfuðstöðvum Evrópusambandsins í Brussel að hann hefði rætt við Barack Obama Bandaríkjaforseta og fordæmt árásirnar í Líbíu. Á sama tíma tókst mótmælendum við sendiráð Bandaríkjanna í Kaíró að klífa veggi sendiráðsins og skipta um stund út fána Bandaríkjanna fyrir svartan fána íslamista.

Í Dhaka í Bangladess stöðvaði lögregla í gær göngu mótmælenda þar sem slagorð voru kyrjuð og fáni Bandaríkjanna brenndur til að mótmæla óhróðursmyndinni. Þá sást þungvopnað lið hermanna og varða við sendiráð Bandaríkjanna í höfuðborg Filippseyja.olikr@frettabladid.is