Bandarísk sérsveit send til Líbíu

Christopher Stevens, sendiherra Bandaríkjanna í Líbíu, lét lífið í fyrrinótt í árás á sendiráðið í Bengasí. Vopnaðir menn réðust inn á sendiráðslóðina, skutu á byggingar og köstuðu heimatilbúnum sprengjum.

Bandaríkjamenn brugðust við með því að senda sérsveitarmenn, sérhæfða í baráttu við hryðjuverkamenn, til Líbíu.

Barack Obama Bandaríkjaforseti fordæmdi árásina og sagðist ætla að sjá til þess að árásarmönnunum yrði refsað.

Auk sendiherrans urðu mennirnir þremur öðrum starfsmönnum sendiráðsins að bana.

Tilefni árásarinnar var bandarísk kvikmynd, sem stefnt er gegn múslímum og Múhammeð spámanni þeirra. Myndin er gerð af vanefnum, en hefur að hluta verið birt á Youtube í arabískri þýðingu.

Myndin varð tilefni til mótmæla víða við sendiráð og stofnanir Bandaríkjanna. Í Egyptalandi klifruðu mótmælendur yfir vegg umhverfis bandaríska sendiráðið í Kaíró nokkrum klukkustundum áður en árásin var gerð á sendiráðið í Líbíu. Stevens er fyrsti bandaríski sendiherrann sem hryðjuverkamenn ráða af dögum síðan árið 1979, þegar Adolph Dubs var myrtur í Afganistan. - gb