Varð fyrir bifreið en myrt síðar

Lík norsku stúlkunnar Sigrid Giskegjerde Schjetne var með mikla áverka á höfði þegar það fannst fyrr í vikunni.

Norskir fjölmiðlar fullyrða að lögreglan telji að ekið hafi verið á hana kvöldið sem hún hvarf, sem var seint að kvöldi laugardagsins 4. ágúst, en hún hafi ekki látist af þeim áverkum heldur verið flutt eitthvert annað og drepin síðar.

Tveir menn eru enn í haldi grunaðir um morðið, annar er 37 ára en hinn 64 ára. Talið er að sá yngri hafi ekið á stúlkuna, en ekki hefur verið upplýst hvaða hlut sá eldri gæti hafa átt að morðinu.

Rannsókn lögreglunnar beinist meðal annars að bifreiðinni, sem talið er að hafi verið ekið á stúlkuna.

Yngri maðurinn seldi græna bifreið af gerðinni Citroen Xantia nokkrum dögum eftir hvarf stúlkunnar. Kaupandi bifreiðarinnar hefur verið í yfirheyrslum hjá lögreglunni. Ýmsar skemmdir eru á bifreiðinni sem gætu komið heim og saman við það að henni hafi verið ekið á stúlkuna.

- gb