Barinn opinn öllum nemendum

Læknafélag Danmerkur vill að unglingum undir lögaldri verði meinað að kaupa áfengi á barnum á skólaböllum. Samkvæmt könnun danska blaðsins Politiken leyfa sjö af hverjum tíu menntastofnunum fyrir unglinga á framhaldsskólaaldri öllum nemendunum að kaupa áfengi á skólaskemmtunum.

Bæði danska læknafélagið og heilbrigðisyfirvöld eru fylgjandi því að sömu reglur gildi á þessum skemmtunum og annars staðar í samfélaginu þannig að yngri en 18 ára fái ekki afgreiðslu á barnum. Menntastofnanirnar líta hins vegar svo á að um einkasamkvæmi sé að ræða og þess vegna gildi ekki sömu reglur um þau. Sé skólaballið hins vegar opið fleirum en nemendum skólans þarf leyfi lögregluyfirvalda fyrir afgreiðslu vínveitinga.

Á vefsíðu danska ríkisútvarpsins kveðst nemandi hafa séð brotnar vodkaflöskur og tómar bjórdósir á skólalóðinni þegar hann kom í skólann. „Við stöndum fyrir utan og drekkum áður en við förum inn,“ segir hann meðal annars. Nemandinn segir að það sé alveg hægt að skemmta sér án áfengis. Hann og hans félagar myndu hins vegar fara í bæinn fengju þeir ekki að drekka á skólaskemmtunum.

- ibs