Telur verkið nánast ómögulegt

Sýrlenski herinn varpaði í gær sprengjum á bæinn al Bab, sem er skammt frá tyrknesku landamærunum. Árásirnar kostuðu að minnsta kosti 19 manns lífið.

Átökin í landinu hafa kostað meira en 23 þúsund manns lífið frá því þau hófust snemma á síðasta ári.

Lakhdar Brahimi, nýr friðarerindreki Sameinuðu þjóðanna og Arababandalagsins, segist ekki hafa mikla trú á að friður náist í landinu á næstunni.

Hann sagði forvera sinn í þessu erfiða embætti, Kofi Annan, fyrrverandi framkvæmdastjóra Sameinuðu þjóðanna, einnig hafa gert allt sem hann gat, en þetta væri mjög erfitt verkefni: „Við ræddum þetta nokkrum sinnum og ég get ekki séð að ég hefði gert neitt öðruvísi en hann.“

Hann hvatti síðan Tyrkland, Sádi-Arabíu og Katar til þess að hætta að senda uppreisnarmönnum vopn og veita þeim æfingaaðstöðu.

Omar al Zoebri, upplýsingaráðherra Sýrlands, sagðist hins vegar ætla að veita Brahimi alla þá aðstoð sem hann gæti: „Við munum veita honum hámarksaðstoð, rétt eins og við veittum Kofi Annan.“- gb