Verkföll í fleiri námum í S-Afríku

Verkföll suður-afrískra námuverkamanna hafa breiðst út með því að verkamenn í tveimur námum til viðbótar kalla eftir hærri launum. Jacob Zuma, forseti Suður-Afríku, heimsótti í gær námu þar sem lögregla skaut 34 og særði 78 þann 16. ágúst.

Áframhaldandi launabarátta og tilheyrandi verkföll hafa valdið ótta um að fleiri námur verði óstarfhæfar. Suður-Afríka sér heiminum fyrir þremur fjórðu af allri platínu. Þá óttast menn að verkföllin muni hafa afdrifarík áhrif á hagkerfi landsins.

Þá hafa stjórnmálamenn héraðsins þar sem voðaverkin voru framin fyrr í mánuðinum varað við því að geri stjórnvöld ekki neitt í gríðarlegum ójöfnuði meðal íbúa landsins, megi búast við því að íbúum þyki ekkert betra að búa við stjórn meirihluta blökkumanna, en stjórn minnihluta rasískra stjórnvalda hvítra manna.

Tafir á framleiðslu platínu í heiminum eru ekki taldar hafa áhrif til skemmri tíma því talið er að þær platínubirgðir sem þegar hafa verið grafnar upp dugi í allt að tvö ár. - bþh