Tugir gengu berserksgang á bráðamóttöku

Tugir manna eiga yfir höfði sér ákæru eftir að þeir réðust inn á bráðamóttökuna á sjúkrahúsinu í Óðinsvéum seint í fyrrakvöld og brutu þar allt og brömluðu.

Upptök málsins eru rakin til átaka milli gengja í borginni, en fyrr um kvöldið hafði 26 ára gamall maður verið fluttur á sjúkrahúsið með skotsár og stungusár.

Árásarmennirnir létu ekki þar við sitja heldur fjölmenntu upp að sjúkrahúsinu og heimtuðu að fá að hitta hinn særða.

Talið er að á bilinu sextíu til áttatíu manns hafi mætt með barefli, kylfur og hnúajárn. Þeir ógnuðu starfsfólki, rifu myndir niður af veggjum og brutu blómapotta áður en lögregla náði að reka þá út úr húsinu. Þar skemmdu þeir sjúkrabíl og lögreglubíl áður en yfir lauk.

Lögreglustjórinn í Óðinsvéum sagðist í samtali við danska miðla vænta þess að menn yrðu handteknir vegna málsins á næstu dögum. Sakarefni væru meðal annars óspektir, brot gegn valdstjórninni, ólöglegur vopnaburður og skemmdarverk.

Jane Kragelund, forstjóri sjúkrahússins, sagði í samtali við TV2 að hún þekkti engin dæmi um viðlíka árás á sjúkrahús í Danmörku.

„Hingað til höfum við ekki verið með öryggisvakt á bráðamóttökunni en nú verðum við að sjálfsögðu að meta hvort þörf sé fyrir slíkt,“ sagði hún.

Í fréttatilkynningu frá sjúkrahúsinu segir að bráðamóttakan hafi verið lokuð í tvo klukkutíma og opnuð klukkan þrjú. Starfsfólk og sjúklingar munu fá áfallahjálp í framhaldinu. - þj