Sprengjuárásir kostuðu tugi lífa

Tugir manna féllu í sprengjuárásum stjórnarhersins á borgirnar Aleppo og Daraa í Sýrlandi í gær, á öðrum degi lokahátíðar föstumánaðarins ramadan.

Lokahátíðin er þriggja daga hátíð, sem múslimar halda upp á með því að fara í sparifötin, snæða góðan mat og heimsækja grafir látinna ástvina sinna.

Á sunnudaginn, fyrsta dag hátíðarinnar, gerði herinn að miklu leyti hlé á árásum sínum, en árásirnar í gær sýna að Bashar al-Assad forseti lætur ekki trúarhátíðina stöðva viðleitni sína til að vinna bug á uppreisnarmönnum.

Ummæli Lakhdars Brahimis, friðarerindreka Sameinuðu þjóðanna og Arababandalagsins í Sýrlandi, þess efnis að ekki væri lengur um það að ræða að koma í veg fyrir að borgarastríð brjótist út, heldur þurfi starfið nú að beinast að því að stöðva borgarastríð sem þegar væri hafið, hafa farið fyrir brjóstið á sýrlenskum ráðamönnum.

Utanríkisráðuneyti Sýrlands segir að Brahimi geti ekki tekist ætlunarverk sitt nema með því að fá þau ríki, sem styðja uppreisnarmenn, til þess að láta af stuðningi sínum.- gb