Vöxtum verði haldið í lágmarki

Inngrip Seðlabanka Evrópusambandsins í skuldavanda evruríkjanna verða líklega fólgin í því að bankinn kaupi upp hluta af skuldum skuldugustu ríkjanna, og haldi með því vöxtum á öðrum skuldum ríkjanna niðri.

Þessu er haldið fram í þýska vikuritinu Der Spiegel, en þar kemur einnig fram að endanleg ákvörðun um þetta verði ekki tekin fyrr en á næsta fundi bankastjórnarinnar í byrjun september.

Það eru einkum vaxtagreiðslurnar sem hafa sligað skuldugu ríkin og komið þeim í þann vanda, sem nú er glímt við á evrusvæðinu. Vextirnir hafa hækkað hratt undanfarið eftir því sem trú markaða á greiðslugetu ríkjanna hefur minnkað, en þetta er vítahringur því með hækkandi vöxtum minnkar greiðslugetan enn frekar.

Hugmyndin, sem samkvæmt heimildum Der Spiegel er nú rædd innan bankans, er sú að bankinn kaupi skuldir þegar markaðsvextir eru komnir yfir ákveðið hámark. Þar með geti fjárfestar ekki lengur knúið vextina upp endalaust. - gb