Mikil innspýting í brasilíska hagkerfið

Dilma Rousseff, forseti Brasilíu, kynnti í gær áform um umfangsmiklar efnahagslegar örvunaraðgerðir í landinu. Hyggst ríkisstjórn hennar verja jafngildi tæplega 8.000 milljarða íslenskra króna í fjárfestingar í innviðum landsins, svo sem í gatna- og járnbrautarkerfi.

Hagvöxtur hefur verið mikill í Brasilíu síðasta áratuginn og er hagkerfi landsins orðið hið sjötta stærsta í heimi. Heldur hefur þó dregið úr þrótti hagkerfisins síðustu misseri og hyggst ríkisstjórn Rousseff bregðast við því með þessum aðgerðum.

Á blaðamannafundi í gær sagði Roussef að áformin myndu gera Brasilíu ríkari og sterkari. „Brasilía mun loks eignast samgöngukerfi sem hæfir stærð landsins,“ sagði Rousseff enn fremur.

Meðal ráðgerðra fjárfestinga má nefna lagningu 10.000 kílómetra af járnbrautarteinum og 7.500 kílómetra af hraðbrautum. Þá verður einnig lagst í uppbyggingu og endurbætur á flugvöllum, höfnum og öðrum samgöngumannvirkjum.

Lélegar samgöngur hafa lengi staðið ört vaxandi útflutningsiðnaði Brasilíu fyrir þrifum. Þannig var samgöngukerfi Brasilíu í sæti 104 af 142 ríkjum í nýlegri skýrslu Alþjóðaefnahagsþingsins (World Economic Forum) um samkeppnishæfni þjóða. Brasilía flytur út gríðarlegt magn hrávara á hverju ári sem í mörgum tilvikum þarf að flytja langt innan úr landinu til hafnar. - mþl