Þúsundir vilja fá atvinnuleyfi

Hundruð þúsunda ólöglegra innflytjenda sækja um dvalarleyfi í Bandaríkjunum eftir að reglur voru rýmkaðar nú í vikunni.

Þeir geta nú fengið atvinnuleyfi, sem tryggir að þeim verður ekki vísað úr landi. Þeir geta þó ekki gert sér vonir um ríkisborgararétt síðar meir.

Ströng skilyrði eru auk þess sett fyrir því að þeir geti fengið atvinnuleyfi: Þeir mega ekki vera eldri en þrítugir, þeir verða að hafa komið til Bandaríkjanna áður en þeir náðu sextán ára aldri og þeir verða að hafa búið í landinu í að minnsta kosti fimm ár. Auk þess þurfa þeir að vera skráðir í skóla, eða vera útskrifaðir úr skóla, eða hafa gegnt herþjónustu.

Barack Obama forseti boðaði þessar breytingar í júní eftir mikinn þrýsting frá íbúum af rómönskum uppruna, sem gagnrýndu hann fyrir að hafa ekki staðið við kosningaloforð um að endurskoða þau flóknu lög sem gilt hafa um innflytjendur í Bandaríkjunum.

- gb