Barist við sex skógarelda á Spáni

Tveir slökkviliðsmenn í Alicante á Spáni eru látnir eftir að hafa barist við skógarelda þar. Í gær var barist við sex skógarelda í landinu og hafa margir þurft að yfirgefa heimili sín vegna þessa.

Meðal alvarlegri elda nú er sá á La Gomera-eyju, einni af Kanaríeyjum, en þar þurftu nærri þúsund ferðamenn og íbúar að flýja bæinn Valle Gran Rey yfir á meginland Afríku vegna skógareldanna. Enn er óvíst hvort eldurinn í hlíðunum fyrir ofan bæinn læsi sig í húsin þar. Þrjú þúsund manns til viðbótar biðu nánari fyrirmæla í höfn bæjarins.

Rúmlega þrjú þúsund hektarar skóglendis á La Gomera eru brunnir en eldarnir hafa geysað síðan 4. ágúst. Þá voru fimm þúsund manns fluttir á brott frá öðrum bæjum á La Gomera og Tenerife, ferðamanna eyjunni vinsælu, um helgina.

Þó Kanaríeyjar séu vinsæll ferðamannastaður segja yfirvöld eldana ekki hafa truflað iðnaðinn mikið.

Liðinn vetur var mjög þurr á Spáni og honum fylgdi þurrt og hlýtt sumar. Hitastigið hefur sums staðar náð 44 gráðum. Það hefur aukið hættuna á skógareldum mikið. - bþh