Bóndinn á brunastað efins um slökkvistarf

„Það var maður sem fór að grilla hérna við vatnið og kveikti í og laumaðist svo í burt,“ segir Samúel Sigurjónsson, bóndi í Hrafnabjörgum í Laugardal í Ísafjarðardjúpi, um upptök eldsins sem logað hefur í landi hans frá því á föstudag í síðustu viku.

Slökkvilið Ísafjarðarbæjar hefur barist við eldinn í Hrossatanga sem gengur út í Laugarbólsvatn í miðjum Laugardalnum. Auk aðstoðar frá þyrlu Landhelgisgæslunnar í fyrradag kom mannskapur í gær frá slökkviliðinu á Hólmavík.

Þorbjörn Sveinsson slökkviliðsstjóri segir Laugarbólsvatn og Laugardalsána sem úr því rennur hindra eldinn í að komast yfir í vesturhluta dalsins. Hins vegar hefur hvass vindur úr vestri greitt eldinum leið út dalinn þar sem allur gróður og jarðvegur sé skraufþurr. Þorbjörn segir að tekist hafi að halda eldinum í skefjum. „En hann logar upp aftur og aftur,“ segir Þorbjörn.

Í gær var hafist handa við að grafa tveggja metra breiðan og um eitt hundrað metra langan skurð þvert yfir tangann þar sem eldurinn kraumar enn í jarðvegi og gróðri. Þorbjörn segir skurðinum ætlað að afmarka brunasvæðið. „Síðan er ekkert annað að gera en að dæla á þetta vatni,“ segir slökkviliðsstjórinn sem kveður skurðinn grafinn í samráði við landeigandann. Sá hefur hins vegar litla trú á skurðgreftrinum.

„Mér finnst þetta tómt óráð,“ segir Sigurjón í Hrafnabjörgum. „Ég tel að þeir ættu að leggja meira kapp í að bleyta þetta og taka sér ekki frí þegar komið er að kvöldi og koma svo kannski ekki fyrr en um tíuleytið daginn eftir þegar hvessir og þeir ráða ekki við neitt.“

Samkvæmt því sem Þorbjörn segir var þó mannskapur á staðnum í fyrrinótt. Á bilinu 20 til 25 manns hafi verið í Hrossatanga í gær með slökkvibíla og dælur auk þess sem von sé á viðbótartækjum. „Við vonumst til þess að geta klárað þetta um helgina,“ segir slökkviliðsstjórinn og bætir við að gengið verði þannig frá skurðinum að hægt verði að græða í sárið aftur.

Sigurjón segir að landið sem er brunnið sé um átta hektarar. Það var gróið lyngi, fjalldrapa og grasi. „Þetta var beitiland en það er allt brunnið niður í grjót,“ segir bóndinn.

Slökkviliðsstjórinn segir eldsupptökin ókunn en kveður varla um annað að ræða en að eldurinn sé af mannavöldum.

gar@frettabladid.is