Innlent

Samningar við Huang Nubo langt komnir

Huang sagðist, í viðtali við Bloomberg í gær, ráðgera að reisa hótel, um 100 einbýlishús og golfvöll á hinu byggilega svæði Grímsstaða. Þá verði boðið upp á ýmiss konar afþreyingu á svæðinu.
Huang sagðist, í viðtali við Bloomberg í gær, ráðgera að reisa hótel, um 100 einbýlishús og golfvöll á hinu byggilega svæði Grímsstaða. Þá verði boðið upp á ýmiss konar afþreyingu á svæðinu. Nordicphotos/AFP
Samningaviðræður félags Huangs Nubo við sex sveitarfélög á Norðausturlandi um kaup og leigu á Grímsstöðum á Fjöllum eru langt komnar. Huang segir að heildarfjárfesting hans hér á landi muni nema ríflega 25 milljörðum króna.

Samningaviðræðum Zhongkun-fjárfestingafélagsins, í eigu kínverska fjárfestisins Huangs Nubo, við sveitarfélög á Norðausturlandi um langtímaleigu á Grímsstöðum á Fjöllum eru langt komnar. Vonast er eftir því að skrifað verði undir leigusamning á næstu vikum.

„Þetta mál er komið mjög langt og er í fínum farvegi. Við vonumst eftir því að geta látið á þetta reyna innan tiltölulega skamms tíma,“ segir Bergur Elías Ágústsson, bæjarstjóri Norðurþings og stjórnarformaður GÁF sem er einkahlutafélag í eigu sex sveitarfélaga á Norðausturlandi. Var félagið stofnað til að undirbúa kaup og leigu á Grímsstöðum.

Bergur segir að þegar sé fengin niðurstaða í flest þau atriði sem semja hafi þurft um. Nú sé í gangi lögfræðivinna sem snúi að því að fínpússa samninginn. Bergur segist ekki geta tjáð sig efnislega um samkomulagið fyrr en skrifað hafi verið undir samning. Niðurstaðan sé þó í takti við það sem sveitarfélögin hafi lagt upp með í upphafi.

Loks segir Bergur að gangi allt að óskum fari hönnunarvinna brátt af stað. Að henni lokinni geti framkvæmdir hafist, sem gæti orðið árið 2014.

Huang sagði sjálfur í viðtali við bandarísku viðskiptafréttaveituna Bloomberg í gær að samningaviðræðunum væri lokið þótt enn hefði ekki verið skrifað undir formlegan leigusamning. Skrifað yrði undir samninginn í síðasta lagi í október.

Samkvæmt frétt Bloomberg er leiguverðið tæplega 7,8 milljónir Bandaríkjadala, jafngildi um 990 milljóna íslenskra króna. Þá kemur fram í fréttinni að leiguverðið sé um einni milljón dala lægra en það kaupverð lóðarinnar sem rætt hafði verið um.

Þá er haft eftir Huang að heildarfjárfesting hans vegna leigu á landinu og uppbyggingar á svæðinu verði tæplega 200 milljónir Bandaríkjadala, jafngildi ríflega 25 milljarða króna.

Huang ráðgerir að reisa hótel, um 100 einbýlishús og golfvöll á hinu byggilega svæði Grímsstaða en landið verður að hans sögn leigt til fjörutíu ára með möguleika á framlengingu til annarra fjörutíu ára. Þá verður hinn hluti lóðarinnar notaður sem útivistarsvæði þar sem boðið verður upp á afþreyingu á borð við hestaferðir, fjallgöngur og svifdrekaflug.

Huang kveðst vonast til þess að sala á einbýlishúsunum, að mestu til ríkra Kínverja, muni nægja til að greiða upp verkefnið.

magnusl@frettabladid.is



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.