Dauðariðillinn á EM af stað í dag

Tveir stórleikir eru á dagskrá Evrópumeistaramótsins í dag þegar keppni í B-riðli, sem hefur verið kallaður dauðariðill keppninnar, hefst í Úkraínu. Holland og Danmörk eigast við í fyrri viðureign dagsins en í kvöldleiknum mætast lið Þýskalands og Portúgals.

Fyrirfram er talið að Þýskaland, Holland og Portúgal muni berjast um efstu tvö sæti riðilsins og áframhaldandi þátttökurétt. Danmörk er ekki með jafn sterkt lið á pappírnum en Danir hafa áður náð að koma á óvart á stórmótum í knattspyrnu.

„Allt annað en sigur á þessu móti verður vonbrigði fyrir Hollendinga," sagði Morten Olsen, landsliðsþjálfari Dana, í gær. „En við getum ekki leyft okkur slíkan hugsunarmáta. Það yrði gríðarlegur sigur fyrir okkur að komast upp úr riðlinum," bætti hann við.

Sagan er einnig á bandi Hollendinga en þeir töpuðu síðast fyrir Danmörku fyrir tæpum 45 árum síðan.

Fá lið búa yfir meiri sóknarkrafti en það hollenska enda valinn maður í hverju rúmi. Þeir sem skipa varnarlínu liðsins eru hins vegar minna þekktir og varð liðið fyrir miklu áfalli þegar að miðvörðurinn Joris Mathijsen meiddist skömmu fyrir mót. Þá eru fleiri vandræðastöður í vörninni og er jafnvel líklegt að hinn átján ára Jetro Willems verði vinstri bakvörður Hollands og þar með yngsti leikmaður EM frá upphafi.

Þjóðverjar eru hins vegar með afar heilsteypt lið og þykja því líklegir til að fara alla leið í sjálfan úrslitaleikinn. Þýska liðið er þar að auki ungt en þrátt fyrir það gríðarlega vel skipað.

Þýskaland vann alla tíu leiki sína í undankeppninni og er Joachim Löw, landsliðsþjálfari, með alla sína leikmenn heila fyrir leikinn í dag.

Það eru heldur engin meiðsli í herbúðum Portúgals en Manchester United-maðurinn Nani hefur jafnað sig á meiðslum í fæti og ætti að spila í dag. Það mun mikið mæða á honum sem og Cristiano Ronaldo, leikmanni Real Madrid.

„Lykilatriði er að hafa gaman að þessu," sagði Ronaldo. „Það er mikil og góð stemning í hópnum og ég er því bjartsýnn. Við viljum sýna hvað við getum á vellinum."