Skip LÍÚ bundin við bryggju út vikuna

Útvegsmenn munu halda skipum við bryggju út vikuna. Boðað er til allsherjarsamstöðufundar útvegsmanna og starfsfólks í sjávarútvegi á morgun. Forstjóri Brims og sjávarútvegsráðherra skiptust á skoðunum á fundi í Reykjavík í gær.

Fiskiskip aðildarfélaga Landssambands íslenskra útvegsmanna (LÍÚ) verða bundin við bryggju út vikuna eins og boðað hafði verið í mótmælaskyni við frumvörp stjórnvalda um veiðigjöld og stjórn fiskveiða. Stefnt er að því að halda stóran fund útvegsmanna og starfsfólks í sjávarútvegi á morgun.

Hlynur Sigurðsson, upplýsingafulltrúi LÍÚ, segir í samtali við Fréttablaðið að um samstöðufund verði að ræða.

„Þarna verður kallað eftir nánara samráði frá stjórnvöldum og lögð áhersla á að vandað verði til verka,“ segir Hlynur.

Steingrímur J. Sigfússon, sjávarútvegsráðherra, mætti í gær til fundar sem Guðmundur Kristjánsson, forstjóri útvegsfyrirtækisins Brims, hafði boðað til með starfsfólki sínu þar sem rætt var um frumvörpin og áhrif þeirra á rekstur sjávarútvegsfyrirtækja.

Guðmundur kynnti fyrst þau sjónarmið útvegsmanna að þau veiðigjöld sem gert væri ráð fyrir í frumvarpi stjórnarinnar myndu hafa skaðleg áhrif á rekstrargrundvöll útvegsfyrirtækja.

Meðal annars myndi gjaldið draga kraft úr greininni, með tilliti til nýfjárfestinga, auk þess sem kerfið myndi grafa undan hagkvæmni þess að sækja ákveðnar tegundir. Þá taldi hann sýnt að veiðileyfagjaldið myndi koma til með að skerða kjör sjómanna.

Guðmundur ítrekaði einnig það sjónarmið útvegsmanna að ekki hafi verið tekið tillit til annarra sjónarmiða. Hann sagði frumvörpin samin „af þröngum hópi fólks“ og að þau hefðu ekki fengið góða einkunn hjá umsagnaraðilum. „Samt á að þröngva þeim í gegnum þingið og við óttumst skaðann sem þau geta gert samfélaginu.“

Þá gagnrýndi Guðmundur einnig að í frumvarpinu um stjórn fiskveiða sé gert ráð fyrir því að um 30.000 þorskígildistonn fari í leigupotta, ráðherra til ráðstöfunar.

Í máli sínu sagði Steingrímur að sannarlega hefði verið tekið tillit til mismunandi sjónarmiða við gerð frumvarpanna. Það sæist gjörla á þeim breytingum sem hefðu orðið á fyrri frumvörpum og þeim breytingum sem veiðileyfafrumvarpið hefði tekið í meðförum þingsins.

Hann sagði flest útvegsfyrirtæki vel geta ráðið við greiðslu veiðileyfagjalds og lagði einnig áherslu á að framlegð sjávarútvegsins í heild yrði jákvæðari nú, kæmu frumvörpin til framkvæmda, en hún hefði verið á árabilinu 2001 til 2008. Frá árinu 2008 hefði eigið fé útgerðarfyrirtækja farið úr því að vera neikvætt um 60 milljarða króna upp í að vera jákvætt um 160 milljarða.

Steingrímur sagði spár benda til þess að framlegð útvegsfyrirtækja þetta ár yrði 78 milljarðar. Eftir að 15 milljarðar yrðu teknir í veiðigjöld væru enn eftir 63 milljarðar í fjármunamyndun í greininni. „Ef sjávarútvegurinn ræður ekki við það, hvernig lifði hann þá af árin 2002 til 2008?“thorgils@frettabladid.is