Vill ekki gefa ungu fólki falsvonir

Mögulegt er að lækka þurfi ávöxtunarkröfu lífeyrissjóðanna úr 3,5% vegna efasemda um að svo há ávöxtun geti náðst til langs tíma. Það er mikilvægt er að gefa ekki ungu fólki falskar vonir um lífeyri í framtíðinni, segir Þórey S. Þórðardóttir, framkvæmdastjóri Landssamtaka lífeyrissjóða.

Hún segir skiptar skoðanir um það innan samtakanna hvort lífeyrissjóðirnir muni til lengri tíma geta náð 3,5 prósenta ávöxtun. Sumir telji að það muni nást en aðrir telji slíkt útilokað.

Hún segir varasamt að taka ákvörðun um þetta í því ólguástandi sem ríki um þessar mundir. Betra sé að bíða þess að stöðugleiki komist á og taka þá yfirvegaða ákvörðun um hvort rétt sé að lækka ávöxtunarkröfuna.

Með óbreyttri ávöxtunarkröfu, ef ljóst þykir að sú ávöxtun muni ekki nást, er verið að gefa ungu fólki rangar væntingar til lífeyris í framtíðinni, segir Þórey.

Hún segir að mögulegar breytingar muni einkum koma niður á ungu fólki. Það gefi augaleið að skerða þurfi réttindi þeirra sem nú safni sér lífeyri verði ávöxtunin lægri en sú sem miðað hafi verið við. - bj