Ein björgunarþyrla í tvær til fjórar vikur

Landhelgisgæslan mun þurfa að reiða sig á eina björgunarþyrlu í allt að fjórar vikur frá miðjum janúar. Ákveðið hefur verið að leigja norska þyrlu til að leysa TF-LIF af hólmi meðan að skylduskoðun fer fram. Leiguþyrlan verður hins vegar ekki tilbúin til notkunar fyrr en tveimur til fjórum vikum eftir að LÍF fer af landi brott.

Georg Lárusson, forstjóri LHG, segir að í versta falli verði leiguþyrlan ekki tilbúin fyrr en um miðjan febrúar. „En það er þarna gat þar sem aðeins ein þyrla er til reiðu. Við munum tala við okkar samstarfsaðila, þá helst Dani, um að þeir reyni að hafa sín skip sem næst okkur. Ekkert er í hendi hvað það varðar.“

Georg segir þessa stöðu mjög óþægilega fyrir Gæsluna. „En fyrst og síðast snýr þetta að þeim sem þurfa að nota þjónustuna ef svo illa fer að á henni verður þörf í þessum glugga.“

Georg segir að farið hafi verið fram á að gengið yrði frá leigu á þyrlu fyrir rúmlega ári enda vitað lengi að Líf færi í þessa skoðun í janúar. Fjármagn frá stjórnvöldum fékkst hins vegar ekki fyrr en nýlega.

Að sögn Georgs er tímafrekt að ljúka skráningu þyrlunnar sem ekki er síst til að tefja að þyrlan komist í gagnið. Kostnaður við að leigja þyrlu er um 200 milljónir króna fram til 23. mars þegar áætlað er að skoðun á Líf ljúki. Þyrlan sem verður leigð er sömu tegundar og björgunarþyrlurnar TF-LIF og TF-GNA. - shá