Bruce Willis íhugar málshöfðun gegn Apple

Bandaríski stórleikarinn Bruce Willis íhugar nú að höfða mál á hendur tæknirisanum Apple og vefversluninni iTunes. Willis, sem er mikill tónlistarunnandi, krefst þess að hann fái að ánafna fjölskyldu sinni tónlistarsafni sínu þegar hann geispar loks golunni.

Samkvæmt notendaskilmálum iTunes er viðskiptavinum óheimilt að dreifa þeirri tónlist sem keypt er í versluninni. Þannig eru tónlistarskrárnar aðeins fengnar að láni.

Willis er hreint ekki sáttur með þetta og íhugar hann nú málshöfðun gegn Apple. Leikarinn hefur gefið út að hann hafi fjárfest í nokkur þúsund lögum í gegnum iTunes.

Þetta er ekki í fyrsta sinn sem slíkt mál kemur upp. Nú þegar standa fimm slík dómsmál yfir í Bandaríkjunum og telja margir að Willis muni einfaldlega styðja við bakið á þeim einstaklingum sem tóku slaginn við Apple.