Átök harðna í Sýrlandi

Að koma á friði milli stríðandi fylkinga í Sýrlandi er gífurlega erfitt verkefni. Þetta segir Lakhdar Brahimi, nýr erindreki Sameinuðu Þjóðanna og Arabandalagsins í Sýrlandi.Hann heimsækir landið á næstu dögum mun þá reyna að miðla málum milli uppreisnarmanna og stjórnvalda í Sýrlandi.

Átök hafa farið versnandi í Sýrlandi síðustu vikur. Þá var síðasti mánuður sá blóðugasti frá upphafi stjórnarbyltingarinnar fyrir sautján mánuðum. Mannréttindasamtök segja að fimm þúsund manns hafi verið drepin í ágúst.

Þá berjast uppreisnarmenn og öryggissveitir enn um yfirráð yfir Aleppo, fjölmennustu borg Sýrlands. Að minnsta kosti átján létust í borginni í dag þegar herþotur létu sprengjum rigna yfir hana.

Byltingin gegn ríkisstjórn Bashar al-Assad, forseta Sýrlands, hófst í mars á síðast ári. Síðan þá hafa friðsamleg mótmæli orðið að heiftugri borgarastyrjöld sem hefur kostað rúmlega tuttugu og þrjú þúsund manns lífið.