Mögulegt að rækta kaffi, sykurmaís og kakóbaunir hér á landi

Guðríður Helgadóttir hjá Landbúnaðarskólanum að Reykjum var gestur í útvarpsþættinum Reykjavík síðdegis í dag. Þar ræddi hún um ýmiskonar ræktun sem mætti reyna á Íslandi.

„Við getum náttúrulega ræktað nánast hvað sem er í gróðurhúsum," segir Guðríður. „Það er síðan spurning hvað ræktunin kostar og hvort hún er samkeppnishæf samanborin við þær vörur sem fáum ódýrari annars staðar."

Guðríður segir að Íslendingar hafi náð miklum árangri með því að rækta grænmeti og aðrar afurðir með því að nota lampa sem líkja eftir litrófi sólarinnar. Hún bendir þó að slíkt ferli sé afar kostnaðarsamt. „Rafmagn er dýrt hjá okkur og það gerir það að verkum að þær afurðir sem við erum að rækta eru töluvert dýrari en þær sem ræktaðar eru undir hefðbundnum skilyrðum."

Þá segir Guðríður að ræktunarmöguleikar hér á landi séu afar fjölbreyttir — það sé hins vegar verkefni stjórnvalda að koma til móts við bændur og lækka verð á rafmagni.

„Það er svo ótrúlega margt sem við gætum ræktað hér á landi," segir Guðríður. „Við höfum prófað eitt og annað í gegnum tíðina. Fræg er nú bananaræktunin okkar á Reykjum."

Þá bendir Guðríður á að kaffiræktun hafi einnig farið fram hér á landi, sem og kakóbaunir og sykurmaís.

Hægt er að hlusta á forvitnilegt viðtal við Guðríði hér fyrir ofan.