Segja stuðningsmenn Assange ábyrga fyrir tölvuárásum

Fjölmargar tölvuárásir voru gerðar á sænska fjölmiðla og aðrar sænskar stofnanir í dag. Talið er að þar hafi verið að verki stuðningsmenn Julians Assange, stofnanda WikiLeaks. Assange er, sem kunnugt er, sakaður um kynferðisbrot gegn tveimur konum þar í landi.

Anders Ahlquist, tölvusérfræðingur hjá Ríkislögreglustjóra í Svíþjóð, segir að vefsvæðin sem ráðist var á eigi ekkert sameiginlegt hvert öðru. „Það virðist bara vera sem menn hafi ráðist á stór vefsvæði í Svíþjóð," er haft eftir Ahlquist á vef norska Aftenposten.