Mikil byrði að vera Þjóðverji

Þýski rithöfundurinn Bernhard Schlink segir að enn í dag sé erfitt fyrir Þjóðverja að takast á við sögu landsins. Hlutverk landsins í síðari heimsstyrjöldinni grúfi yfir landinu og þýsk börn þurfi enn í dag að takast á við sálarangist yfir því að vera Þjóðverjar.

Schlink sagði frá þessu í forsíðufrétt breska blaðsins The Guardian. Þar segist hann aldrei þakka fyrir að vera Þjóðverji enda sé það þung byrði að bera. „En það er stór hluti af sjálfum mér og ég hef lært að takast á við það," segir hann.

Hann segir frá einu fallegasta hrósi sem hann hefur fengið, „Það var kollegi minn í Bandaríkjunum sem sagði að hann hefði aldrei hitt þýskan fræðimann sem reyndi jafnlítið að dylja að hann væri þýskur."

„Við Þjóðverjar viljum frekar líta á okkur sjálfa sem Evrópubúa en Þjóðverja," segir Schlink og telur að það sé ein ástæða þess að evrukrísan sé sérstaklega sársaukafull fyrir Þjóðverja. Með því að gefa sig alla í Evrópusamstarfið hafi Þjóðverjum tekist að flýja sjálfa sig um stund.

Ef Evrópusambandið leysist upp missir Þýskaland um leið þessa flóttaleið undan fortíð sinni. Því telur hann að saga Þýskalands sé helsta ástæðan fyrir því að Þjóðverjar telja sjálfa sig ábyrga fyrir því að halda Evrópusambandinu saman.