Sandy nálgast Jamaica

Íbúar Jamaica búa sig nú undir komu fellibylsins Sandy. Fjölmargir hafa leitað sér skjóls í sérstökum neyðarskýlum sem komið hefur verið upp á suðurströnd landsins.

Yfirvöld hafa lokað nær öllum skólum og flugvöllum og útgöngubanni hefur verið komið á, bæði til að halda fólki innandyra og koma í veg fyrir gripdeildir.

Samkvæmt upplýsingum frá Veðurstofu Jamaica nær vindhraði í Sandy allt að 125 kílómetrum á klukkustund. Einnig er gert ráð fyrir miklu vatnsveðri og hefur veðurstofan lýst áhyggjum sínum af aurskriðum og skyndiflóðum.

Innviðir Jamaica eru í mikilli niðurníðslu og því gæti tjón af völdum Sandy orðið verulegt.