Aldagömul ráðgáta leyst í Noregi

Aldagömul ráðgáta verður leyst í Noreg í dag. Þá mun Kjell Volheim, safnvörður í Guðbrandsdal, opna böggul sem hefur verið lokaður í heila öld. Saga og dulúð pakkans hefur heillað Norðmenn um áraraðir en forsögu hans má rekja til Johans nokkurs Nygaard, fyrsta bæjarstjóra í Sel í Upplöndum.

Á þessum degi árið 1912 gaf Johan bæjaryfirvöldum í Sel böggulinn gegn einu skilyrði: að hann skyldi ekki opna fyrr en árið 2012. Þessum fyrirmælum var fylgt. Pakkinn hefur nú gengið í gegnum tvær heimsstyrjaldir og gengið milli manna og safna.

Það var þó oft tvísýnt um örlög pakkans. Nokkrum sinnum hefur hann týnst og margoft hefur grunur leikið á að forvitni hafi borið umsjónarmenn hans ofurliði.

En hvað er í pakkanum? Sumir halda því fram að söguleg gögn séu þar að finna. Aðrir segja að gleymd hlutabréf í olíufyrirtæki séu í pakkanum. Sjálfur vonast safnvörðurinn Kjell Volheim til að Blástjarnan sjálf sé í pakkanum en þetta dýrmæta nisti er sagt hafa sokkið í sæ ásamt Titanic árið nítján hundruð og tólf.