Lokað fyrir internetið í Sýrlandi

Sýrland er nú svo gott sem lokað frá umheiminum eftir að lokað var fyrir öll helstu fjarskiptakerfi landsins og aðgang að internetinu.

Tvær alþjóðlegar eftirlitsstofnanir hafa staðfest þetta. Í samtali við AP fréttaveituna sagði talsmaður Renesys greiningafyrirtækisins að aðgengi að veraldarvefnum hefði verið rofið fyrr í dag.

Þá hafa uppreisnarmenn í Damaskus, höfuðborg Sýrlands, að sama skapi staðfest þetta en þeir hafa notað gervihnattasíma til að koma upplýsingum til erlendra fjölmiðla.

Yfirvöld í Sýrlandi þvertaka fyrir að hafa lokað á lokun á internetaðgangi. Í yfirlýsingu frá fjarskiptaráðherra landsins kemur fram uppreisnarmenn hafi verið þar að verki.

Síðdegis í dag var tilkynnt að öllum flugum til og frá Damaskus hefði verið aflýst vegna átak uppreisnarmanna og stjórnarhermanna. Fregnir hafa borist af hörðum átökum í grennd við flugvöllinn.

Frá því að stjórnarbyltingin hófst í mars á síðasta ári hafa yfirvöld í Sýrlandi nokkrum sinnum lokað fyrir hluta fjarskiptakerfis landsins. Í nær öllum tilfellum hefur það verið gert í hernaðarlegum tilgangi. Algert rof er þó án fordæma í landinu.

Átök hafa harnað verulega í Damaskus síðustu daga og óttast margir að stjórnarherinn muni blása til stórsóknar í höfuðborginni, nú þegar flæði upplýsinga hefur verið rofið.