Dæmdur til dauða í Íran

Íranskur tölvunarfræðingur hefur verið dæmdur til dauða en hann var fundinn sekur um að hafa framleitt og auglýst klám.

Saeed Malekpour var handtekinn árið 2008 og var fluttur í Evin fangelsið í Teheran. Hann var umsvifalaust færður í einangrun og var þar í eitt ár. Hann fékk ekki að tala við lögfræðing sinn eða fjölskyldu á meðan einangruninni stóð.

Stuttu eftir að Malekpour var látinn laus úr einangrun játaði hann glæpi sína í sjónvarpsviðtali. Hann dró síðan játninguna til baka og sagði að lögreglumenn hefðu neytt hann til að gangast við ásökunum.

Áður en Malekpour var handtekinn hafði hann búið í Kanada í mörg ár. Hann segist hafa hannað ljósmyndaforrit sem klámsíður hafi síðan notað til að birta klámfengnar myndir á internetinu.

Talið er að Malekpour verði tekinn af lífi á næstu dögum.