John Major gagnrýnir myndbirtingu

Fyrrverandi forsætisráðherra Bretlands, John Major, gagnrýnir franska blaðið Closer sem og írska tímaritið Irish Daily harðlega fyrir að birta myndir af hertogaynjunni Kate Middelton berbrjósta.

Major fagnar því að fjölmiðlar í Bretlandi hafi ekki birt myndirnar enn sem komið er en gagnrýnir um leið smekkleysu fjölmiðla annarra landa, svo sem í Frakklandi. Að auki stendur til að bitra myndirnar í ítölsku tímariti sem er í eigu Silvio Berlusconi, fyrrverandi forsætisráðherra Ítalíu.

Aðspuður hvað Major myndi segja við Berlusconi ef þeir hittust á förnum vegi, sagði hann að samræður þeirra á milli yrðu ekki á jákvæðum nótum.

Írska blaðið birti myndirnar af Kate í dag en meðal þeirra sem hafa gagnrýnt birtinguna eru eigendur blaðsins sjálfs.