Bílaröðin var yfir 200 km löng í rússnesku umferðaröngþveiti

Tekist hefur að greiða að mestu úr einu versta umferðaröngþveit í sögu Rússlands en um tíma í gærdag var röð kyrrstæðra bíla á þjóðbrautinni milli Moskvu og Pétursborgar yfir 200 kílómetrar að lengd.

Það sem olli þessu gífurlega umferðaröngþveiti var mikil snjókoma í vesturhluta Rússlands um helgina. Snjónum byrjaði að kyngja niður á föstudag og þegar komið var fram á sunnudagsmorgun var orðið um að ræða nær einn metra af jafnföllnum snjó á þessum slóðum.

Til að gera illt verra skall mikil þoka á þjóðbrautina, sem kallast M-10, í gærmorgun og þá stöðvaðist umferðin um hana að mestu. M-10 er mikið notuð fyrir umferð flutningabíla milli Moskvu og Pétursborgar.

Í frétt um málið á vefsíðu CNN segir að rússneskum vegagerðarmönnum hafi tekist í gærkvöldi að koma á umferð á einni akrein fram og til baka á M-10 þannig að bílaröðin hafði skroppið saman og var orðin um 70 kílómetrar að lengd. Hinsvegar snigluðust bílarnir um brautina á aðeins innan við 10 kílómetra hraða á klukkustund.