Helmingur enskra býst við mistökum hjá sínu liði

Slæm mistök og dramatík hafa elt enska landsliðið á röndum í mörg ár. Rob Green gaf skelfilegt mark á HM 2010, Lampard skoraði þá mark gegn Þjóðverjum sem átti að standa og svona mætti áfram telja. Stuðningsmenn enska landsliðsins eiga von á fleiri dramatískum atvikum á EM.

Markvarðamistök hafa verið sérstaklega algeng hjá enska landsliðinu á stórmótum og því þarf ekki að koma á óvart að 46 prósent stuðningsmanna liðsins spái því að Joe Hart muni gera einhver skelfileg mistök á EM.

Sharp FanLabs hefur staðið fyrir athyglisverðri könnun hjá stuðningsmönnum liðanna á EM og þar kemur margt skemmtilegt í ljós.

Aðeins 5 prósent stuðningsmanna Þýskalands óttast að þeirra lið geri stór mistök.

52 prósent stuðningsmanna spænska liðsins er á því að leikmenn liðsins hafi einum of gaman að baða sig í sviðsljósinu. Sú tala er 47 prósent er kemur að portúgalska liðinu með Ronaldo í broddi fylkingar.

80 prósent sænsku stuðningsmannanna segjast síðan vera til í að hætta að drekka í mánuð í skiptum fyrir árangur hjá sínu liði á EM.