Bannað að taka við bronsinu sínu

Landslið Suður-Kóreu vann brons í fótboltakeppni karla á Ólympíuleikunum í London en einn leikmanna liðsins var þó hvergi sjáanlegur þegar Kóreumenn tóku við bronsinu sínu í gær. Alþjóðaólympíunefndin útilokaði hann nefnilega frá verðlaunaafhendingunni eftir að leikmaðurinn varð uppvís að því að veifa fána með pólitískum skilaboðum eftir sigurinn á Japan í leiknum um 3. sætið.

Park Jong-woo heitir sá sem var fjarverandi en hann 23 ára sóknarmiðjumaður sem spilar með Busan IPark í heimalandinu. Park spilaði allar 90 mínúturnar í bronsleiknum á móti Japan. Hinir 17 leikmenn liðsins fengu allir að taka við bronsinu.

Það er stranglega bannað að auglýsa pólitísk viðhorf á einhvern hátt í keppni á vegnum Alþjóða Ólympíunefndarinnar eða FIFA en Park Jong-woo tók við fána frá áhorfendum þar sem á var slagorð í deilum Kóreumanna og Japana um eyjar sem eru mitt á milli landanna.

Eyjarnar eru kallaðar Dokdo-eyjur í Kóreu en heita Takeshima-eyjur í Japan. Báðar þjóðir gerðu tilkall til eyjanna en Kóreumenn yfirtóku þær árið 1954. Þetta eru litlar eyjar með ekkert ferskt vatn en í kringum þær eru hinsvegar gjöful fiskimið.

FIFA mun rannsaka málið enn frekar og því gæti Park Jong-woo átt í hættu að fá frekari refsingar í næstu framtíð þótt mörgum þykir það afar hart að útiloka hann frá sögulegri stundu í sögu þjóðar sinnar en Suður-Kórea var þarna að vinna sín fyrstu verðlaun á stórmóti í fótbolta.