Sagður plataður til Moskvu

Iraida Spasskaja, systir rússneska stórmeistarans Boris Spasskí, segist sannfærð um að hann hafi ekki flúið til Moskvu í síðustu viku heldur hafi honum verið rænt þegar eiginkona hans brá sér af heimili þeirra.

Spasskí sagðist sjálfur í viðtali við rússneska dagblaðið Komsomoskaja Pravda hafa flúið til Moskvu frá París, þar sem honum hafi verið haldið í einangrun á sterkum lyfjum og án síma- eða netsambands.

Spasskí fékk heilablóðfall fyrir tveimur árum, var lengi á sjúkrahúsi en naut síðan umönnunar hjúkrunarfólks og lækna á heimili sínu þar í borg.

Iraida segist hafa heimsótt bróður sinn nýverið og hafi hann þá unað sér vel.

„Ég held að honum hafi verið rænt af einhverju fólki sem vill nota nafn hans sér til framdráttar," er haft eftir henni á skákfréttasíðunni Chess-News.

Á sama fréttavef er rætt við Rimmu Bilunovu, fulltrúa rússneska skáksambandsins, sem segir að Spasskí sé í Moskvu og njóti þar góðrar umönnunar. „Spasskí á við fjölskylduvandamál að stríða og systir hans styður eiginkonu hans, Marinu. Það voru mistök að senda Boris til Frakklands eftir heilablóðfallið."- gb