Predikarinn Abu Hamza verður framseldur

Undirbúningur er hafinn að því að framselja hinn róttæka predikara Abu Hamza frá Bretlandi til Bandaríkjanna eftir að Mannréttindadómstóll Evrópu hafnaði beiðni hans um áfrýjun á málinu.

Hamza er grunaður um aðild að hryðjuverkum en barátta hans gegn framsalinu hefur staðið yfir í ein átta ár og kostað breska dómskerfið milljónir punda. Stuðningsmenn Hamza segja að baráttu þeirra gegn framsalinu sé hvergi nærri lokið.

Hamza er grunaður um að hafa skipulagt stofnun hryðjuverkamannabækistöðva í Bandaríkjunum og að hafa átt þátt í mannránum í Jemen. Verði hann sakfelldur í Bandaríkjunum bíður hans ævilangt fangelsi þar í landi.