Vill banna bótaþegum að eyða peningum í áfengi og tóbak

Vinnumála- og velferðaráðherra Bretlands, Iain Duncan Smith, vill koma í veg fyrir að fjölskyldur sem fá bætur frá hinu opinbera, eyði peningnum í áfengi og tóbak.

Meðal hugmynda ráðherrans eru að fjölskyldur fái sérstök kort sem hægt er að nota til þess að greiða helstu reikninga, eins og húsaleigu og annað, auk þess sem hægt verður að nota kortið til þess að kaupa matvæli. Ráðherrann segir það sorglega staðreynd að foreldrar nýti peninginn sem þau fái frá hinu opinbera til þess að fjármagna vímuefnaneyslu og á meðan líða börnin fyrir.

Til þess að þessi hugmynd gangi eftir þá þarf lagabreytingu til, en ekki er hægt að skikka bótaþega til þess að eyða peningunum sínum í eitt frekar en annað í því lagaumhverfi sem ríkir í landinu í dag.

Ráðherrann segist vonast til þess að þessar breytingar muni breyta lífi 120 þúsund fjölskyldna til hins betra.