Karlalandsliðið fellur um eitt sæti á FIFA-listanum

Styrkleikalisti FIFA var uppfærður í dag. Íslenska karlalandsliðið fellur um eitt sæti frá því í síðasta mánuði þótt liðið hafi ekki spilað neinn leik á tímabilinu.

Ísland fellur um eitt sæti, úr 129. sæti í sæti 130. Næstu þjóðir á undan Íslendingum eru Gambía (129), Tansanía (128), Líbanon (127) og Kenía (126).

Ísland fær tækifæri til þess að styrkja stöðu sína á listanum þann 15. ágúst. Þá mætir Ísland Færeyingum á Laugardalsvelli. Fá stig eru í boði fyrir sigur í æfingaleik og sérstaklega gegn lakari andstæðingi. Liðin í kringum Ísland eru þó ekki að hala inn stig í hverjum mánuði svo sigur gæti fleytt Íslandi upp um nokkur sæti á listanum.

Litlar breytingar eru á stöðu efstu liða á Íslandi. Spánn situr áfram í efsta sæti og Þjóðverjar þar á eftir. England skýst upp í 3. sæti listans á kostnað Úrúgvæja sem falla í 4. sæti.

Hástökkvarinn á listanum er landslið Líbanon (+17 sæti) en Víetnam rýkur niður um 26 sæti frá því á listanum sem birtur var í júlí.