Löggan komin á Instagram

Lögreglan á höfuðborgarsvæðinu tilkynnti í dag að hér eftir yrðu þeir virkir á Instagram, sem er ljósmyndaforrit sem notað er á snjallsímum. Lögreglan á höfuðborgarsvæðinu var í ár tilnefnd til alþjóðlegra verðlauna fyrir notkun á samfélagsmiðlum og með innreið sinni á Instagram bætir hún enn í vopnabúr sitt á þeim vígvelli.

Á facebook síðu lögreglunnar spunnust nokkrar umræður um þetta uppátæki hennar. Meðal annars vaknaði sú spurning hvort Iphone væri orðinn nýr staðalbúnaður hjá lögreglumönnum.

„Ef það væri nú svo gott. Nei, það er víst ekki þannig," svaraði lögreglan og útskýrði að lögreglumenn sem tækju þátt í verkefninu myndu nota sína eigin síma til þess.

Hægt er að skoða myndir lögreglunnar á facebook síðu hennar undir flipanum Instagram LRH. Instagram notendur geta fundið myndirnar undir notendanafninu: Logreglan.