"Eldurinn læsir sér í ræturnar og fer niður í jörðina“

Slökkvilið Súðavíkur hefur ásamt bóndanum á Látrum barist við sinuelda í hátt í viku. Slökkviliðsstjórinn segir verkefnið eitt það erfiðasta sem hann hafi lent í og óskaði eftir aðstoð Landhelgisgæslunnar í dag.

Slökkviliðið hefur síðan á föstudaginn barist við sinuelda í Laugardal í Ísafjarðardjúpi. Eldur kviknaði þá í mosa og gróðri við Laugarbólsvatn. Hann breiddist nokkuð hratt út enda jörð mjög þurr eftir langvarandi þurrka. Líkt og sést á þessum myndum sem Heiðar B. Jónsson tók þá. Síðan á föstudaginn hafa slökkviliðsmenn barist við sinueldana. Þeir hafa unnið á vöktum og dælt hátt í átta hundruð tonnum af vatni á svæðið á hverjum degi.

„Þetta er erfitt verk. Langerfiðasta verkefni sem ég hef lent í," segir Barði Ingibjartsson, slökkviliðsstjóri.

Í hverju logar? spyr fréttamaður.

„Það byrjar þannig að gróðurinn logar fyrst. En svo eru rætur og annað. Þetta er mest fjalldrapi hér og svo berjalyng. Eldurinn læsir sér í ræturnar og fer niður greinarnar og niður í jörðina og er á kafi í þúfunum. Svo er þetta bara glóð," segir hann.

Hann segir ljóst að eldurinn hafi kviknað af mannavöldum, annað hvort vegna sígarettuglóðar eða út frá grilli.

Hátt í þriggja hektara landsvæðið hefur nú brunnið. Tekist hefur að koma í veg fyrir að eldurinn breiði úr sér og því hafa hvorki mannvirki né tún verið í hættu. Í gær leit út fyrir að búið væri að ná tökum á eldinum en þá bætti í vind. Í dag var því óskað eftir aðstoð Landhelgisgæslunnar og var þyrla send á svæðið til að aðstoða við slökkvistarfið skömmu fyrir fréttir.

„Við vorum nú mjög bjartsýnir í gærkvöldi. En það er erfitt að eiga við þetta núna, þessa glóð sem eftir er. Um leið og vindurinn kemur þá blossar eldur upp úr glóðinni," segir Barði.