Mörkin sem koma til greina sem fallegasta mark ársins

Sérfræðingar og meðlimir í framkvæmdanefnd FIFA hafa nú tilnefnt þau tíu mörk sem koma til greina sem fallegasta markið á þessu ári en sigurvegarinn hlýtur FIFA Puskás verðlaunin.

Gestir á FIFA-síðunni geta nú kosið um hvaða mark þeir vilja fá áfram en þrjú efstu mörkin komast síðan í úrslit þar sem verður síðan kosið á milli þeirra um hvert þeirra er fallegasta mark fótboltaársins.

Hatem Ben Arfa hjá Newcastle á eitt markanna sem komast á tíu marka listann og keppir þar við stórstjörnur eins og þá Lionel Messi, Neymar og Falcao. Það eru líka minna þekktir knattspyrnumenn sem komast á listann á þessu ári.

Neymar skoraði fallegasta markið árið 2011, Hamit Altıntop fékk verðlaunin árið 2010 og mark Cristiano Ronaldo var kosið þegar verðlaunin voru veitt í fyrsta sinn árið 2009.

Það er hægt að sjá öll mörkin með því að smella hér fyrir ofan og kjósa sitt uppáhaldsmark með því að smella hér.