Flóðbylgjuviðvörun dregin til baka

Flóðbylgjuviðvörun sem gefin var út vegna jarðskjálftans við Filippseyjar hefur verið dregin til baka. Skjálftinn var 7,6 stig og vakti ótta um að flóðbylgja myndi skella á löndunum í kring.

Flóðbylgjan sem myndaðist í skjálftanum og lenti á Filippseyjum var ekki nema 16 cm og því var viðvöruninni fljótlega aflýst. Hvergi annars staðar hefur orðið vart við flóðbylgjur en enn getur þó verið hættulegt að sigla á svæðinu vegna hafstrauma í kjölfar skjálftans.

Víða fór rafmagnið af bæjum eftir fyrsta jarðskjálftann, en eftirskjálfti sem var 5,5 stig fylgdi í kjölfarið. Fregnir herma að einhvers staðar hafi hús hrunið en enn hefur ekki spurst af neinu mannfalli. Skjálftinn fannst hins vegar mjög vel á Filippseyjum.