Dæmigerðir ferðamenn: Barnlausir Ameríkanar sem eyða 370 þúsundum

Hinn dæmigerði erlendi sumarferðamaður eru tæplega fertug bandarísk hjón sem koma barnlaus í 10 daga frí, skoða Gullfoss og Geysi og kaupa vöru og þjónustu fyrir 370.000 kr. Og þau ætla að koma aftur, ef marka má niðurstöður könnunar sem Ferðamálastofa lét framkvæma síðasta sumr á meðal erlendra ferðamanna.

Sagt er frá könnuninni á vef iðnaðarráðuneytisins í dag um leið og þess er getið að rúmlega 565 þúsund erlendir ferðamenn hafi heimsótt Ísland á síðasta ári. Þar er um að ræða 15,8 prósent fjölgun frá fyrra ári. „Mikilvægi ferðaþjónustunnar fer stöðugt vaxandi fyrir samfélagið og hún er komin á bekk með sjávarútveginum og stóriðjunni þegar kemur að sköpun gjaldeyristekna," segir ennfremur.

„Hjónin bandarísku ferðuðust á eigin vegum og þau notuðu netið til að afla sér upplýsinga um land og þjóð. Það var íslensk náttúra og menning öðru fremur sem dró þau hingað. Þau leigðu sér bílaleigubíl og gerðu víðreist m.a. um Suðurland og voru dugleg að fara í sund og náttúruböð, auk þess sem þau skoðuðu sýningar, fóru í hvalaskoðun og í útreiðartúr. Hjónin eru vel menntuð og með laun í góðu meðallagi og á ferðalaginu vörðu þau tæplega 370.000 kr. í alls kyns vöru og þjónustu," segir einnig.

„Það er skemmst frá því að segja að þau voru mjög ánægð með ferðina og það sem stendur upp úr er náttúran, Bláa lónið, Reykjavík og íslensk gestrisni. Það kemur því ekki á óvart að þau stefna að því að koma aftur hingað til lands.

Það er vel þess virði að gefa sér tíma til að glöggva sig á könnuninni til að fá fyllri mynd af því hverjir það eru sem velja Ísland sem áfangastað og fá um leið skilning á því eftir hverju þeir eru að sækjast og hvað þykir vel gert og hvaða þætti megi betrumbæta.