Margir lausir endar við réttarhöldin vekja grunsemdir

„Þetta hljómar eins og saga úr ævintýri. Smáatriðin í málinu eru afar lítt trúverðug,“ segir He Weifang, lagaprófessor við Pekingháskóla.

Hann er þarna að tala um morðið á breska kaupsýslumanninum Neil Heywood, sem Gu Kailai, eiginkona kínverska stjórnmálamannsins Bo Xilai, hefur viðurkennt fyrir rétti að hafa framið.

Réttarhöldin fóru fram í lok síðustu viku og stóðu aðeins í sjö klukkustundir. Gu sagði þar að syni sínum hefði stafað hætta af Heywood, hún hafi því ákveðið að eitra fyrir honum. Hún sagðist iðrast gjörða sinna og þykir eiga von til þess að sleppa við dauðadóm.

Fréttaskýrendur, sem fylgdust með réttarhöldunum og aðdraganda þeirra, segja málið samt varla vera alveg svona borðleggjandi.

Stjórnvöld hafa dregið upp þá mynd af Gu að hún hafi verið þunglynd og á lyfjum, sem hafi brenglað dómgreind hennar. Hún hafi platað Heywood inn á hótelherbergi í borginni Chongqing, þar sem hún hafi hellt hann fullan og síðan sett blásýru upp í hann.

Allt hafi þetta gerst vegna þess að hún hafi óttast um líf sonar síns, en hvergi er minnst á spillingu í stjórnkerfinu í tengslum við eiginmann hennar, Bo Xilai, sem átti mikinn frama vísan í kínverska Kommúnistaflokknum en sagði af sér eftir að upp komst um morðið.

Hvergi hefur komið fram hvaða ógn syni Gu stafaði af Bretanum Heywood. Engin skýring hefur heldur verið gefin á því hvers vegna Heywood hafi átt að hafa lagt á sig ferðalag til Chongqing og farið þar upp á hótelherbergi með Gu, eftir að hafa hótað syni hennar öllu illu.

Þá hafa stjórnvöld forðast að spyrja hvort og þá hvernig eiginmaður hennar gæti hafa tengst málinu.

Við réttarhöldin kom engu að síður fram, samkvæmt heimildarmanni fréttastofunnar AP, að Wang Lijun, lögreglustjóri í Chongqing, hafi vitað af morðinu fyrirfram og jafnvel verið með í ráðum.

Bo Xilai hafði mikil völd í borginni Chongqing og lögreglustjórinn var náinn samstarfsmaður hans. Steve Tsang, sérfræðingur í málefnum Kína við háskólann í Nottingham í Bretlandi, segir erfitt að ímynda sér að lögreglustjórinn Wang hafi vitað af þessum ráðagerðum án þess að ræða það við Bo, hvort sem hann átti sjálfur hlut að máli eða ekki:

„Það er erfitt að trúa því að Bo Xilai hafi ekki verið látinn vita og raunar að hann hafi ekki verið beðinn um leyfi.“

gudsteinn@frettabladid.is