Rolling Stones fagna 50 ára afmæli með ljósmyndabók

Hljómsveitin Rolling Stones undirbýr nú 50 ára starfsafmæli sitt. Áfanganum verður fagnað með útgáfu ljósmyndabókar.

Bókin fer í almenna sölu 12. júlí næstkomandi en þá verða liðin 50 ár frá því að hljómsveitin steig fyrst á stokk í Marquee klúbbnum í Lundúnum.

Það er forlagið Thames & Hudson sem annast útgáfu bókarinnar. Í bókinni verða rúmlega 700 ljósmyndir sem sýna feril hljómsveitarinnar. „Þetta er saga síðustu 50 ára og hún er sannarlega stórkostlega," sögðu meðlimir Rolling Stones.

En helst vilja aðdáendur að hljómsveitin fari í tónleikaferðlag til að fagna starfsafmælinu. Meðlimir Rolling Stones hafa lítið gefið upp um hvort að tónleikaferðalag sé döfinni.

Andað hefur köldu milli þeirra Mick Jaggers og Keith Richards síðustu mánuði en sá síðarnefndi fór ófögrum orðum um meðlimi Rolling Stones í nýlegri ævisögu sinni.