Barcelona fær stóran hluta af sölunni á Zlatan

Sænski landsliðsframherjinn Zlatan Ibrahimovic, var nýverið seldur til PSG í Frakklandi frá ítalska liðinu AC Milan. Fjárhagsstaða AC Milan er ekki sem best og Silvio Berlusconi eigandi liðsins varð að grípa til þess ráðs að selja besta og jafnframt dýrasta leikmann liðsins. Stór hluti af kaupverðinu fer hinsvegar í það að greiða spænska félaginu Barcelona gamlar skuldir sem „hvíldu" á leikmanninum.

Þegar Ibrahimovic var seldur frá Barcelona á sínum tíma fékk AC Milan að skipta greiðslunum á nokkur ár. AC Milan hafði ekki lokið við að greiða Barcelona fyrir leikmanninn þegar hann var seldur til PSG og fær Barcelona um 1,2 milljarða kr. í sinn hlut – og AC Milan fær 1,8 milljarða.

Zlatan Ibrahimovic hefur farið víða á ferlinum og samtals hafa fótboltafélög greitt um 22,6 milljarða kr. fyrir leikmanninn.

Malmö - Ajax Amsterdam – 1,2 milljarðar kr.

Ajax - Juventus – 3,7 milljarðar kr.

Juventus - Inter Milan – 3,7 milljarðar kr.

Inter - Barcelona – 7,4 milljarðar kr.

Barcelona - AC Milan – 3,6 milljarðar kr.

AC Milan - PSG – 3 milljarðar kr.