Tvær hópnauðganir af 18 kærðar í fyrra

Lögreglunni á höfuðborgarsvæðinu bárust tvær kærur vegna hópnauðgana í fyrra. 18 einstaklingar leituðu til Stígamóta vegna hópnauðgana árið 2011 og er þetta mesti fjöldi sem hefur leitað sér aðstoðar vegna málaflokksins frá upphafi.

Björgvin Björgvinsson, yfirmaður kynferðisbrotadeildar lögreglunnar, segir engan marktækan fjölda kæra vegna hópnauðgana hafa borist inn á borð lögreglu undanfarin ár.

„[Kærur vegna hópnauðgana] hafa ekki komið inn á borð lögreglu í þessum mæli,“ segir Björgvin. „Á síðasta ári voru kærurnar tvær. Fjöldi mála þar sem gerendur hafa verið fleiri en einn hefur verið á svipuðu róli í gegnum árin.“

Önnur kæran sem um ræðir var á hendur Agli Einarssyni og kærustu hans. Parið var kært fyrir nauðgun í byrjun desember í fyrra. Málið er nú á borði ríkissaksóknara og er búist við því að það taki að minnsta kosti tvo mánuði þar til ákveðið verði hvort ákæra verði gefin út. Hin kæran var á hendur tveimur pólskum karlmönnum, Arkadiusz Zdzislaw Pawlak og Rafal Grajewski. Kona kærði þá fyrir nauðgun í október í fyrra og voru mennirnir dæmdir í fjögurra ára fangelsi í Héraðsdómi Reykjavíkur í janúar.

Þessar fáu kærur koma Guðrúnu Jónsdóttur, talskonu Stígamóta, ekki á óvart.

„Það er mín tilfinning að eftir því sem brotin verða alvarlegri verður erfiðara að kæra,“ segir hún. „Og líklegt er að óttinn eftir atburðinn verði enn meiri ef um hóp gerenda er að ræða.“

Guðrún bendir á að þrátt fyrir að 18 tilkynningar hafi borist, séu tilvikin það fá að eðlilegt sé að fjöldinn taki töluverðum breytingum milli ára, en árið 2010 leituðu 13 einstaklingar til Stígamóta vegna hópnauðgana.

„Þó gæti verið að ein ástæða fjölgunarinnar sé aukin gengjamyndun hér á landi og hvernig sá kúltúr er að festa sig í sessi hér á óskemmtilegan máta,“ segir Guðrún og bætir við að flestir meintir gerendur í málunum hafi verið Íslendingar.

sunna@frettabladid.is