Leiðtogi Los Zetas gengisins felldur í skotbardaga

Talið er að helsti fíkniefnakóngur Mexíkó og leiðtogi Los Zetas glæpagengisins hafi fallið í skotbardaga í norðurhluta Mexíkó.

Sá sem hér um ræðir heitir Heriberto Lazcano en hann gengur einnig undir nafninu Böðullinn. Hann mun hafa stofnað Los Zetas gengið á sínum tíma en gengið er talið ábyrgt fyrir þúsundum morða í Mexíkó á undanförnum árum.

Í frétt um málið á BBC segir að skotbardaginn hafi verið á milli meðlima Los Zetas gengisins og sérsveitar frá mexíkanska flotanum. Tveir af meðlimum gengisins féllu í bardaganum og segir talsmaður flotans að allar líkur séu á að annar þeirra hafi verið Böðullinn.