Átján þúsund manns í Hljómskálagarðinum

Gríðarleg stemning er nú á tónleikum Of Monsters and Men í Hljómskálagarðinum. Talið er að um 18 þúsund manns séu nú saman komin til að hlusta á hljómsveitina sem heillað hefur Íslendinga og Bandaríkjamenn síðustu mánuði.

Mammú og Lay Low hita upp fyrir Of Monsters and Men í kvöld. Talið er að sveitin muni stíga á svið klukkan 21:00.

Þetta eru einu tónleikar hljómsveitarinnar á Íslandi í sumar. Á mánudaginn leggur sveitin síðan í tveggja og hálfs mánaðar tónleikaferðalag — þau munu spila í Ástralíu, víða um Evrópu og í Bandaríkjunum.