Fjöldi fólks hefur fyrirfarið sér við að framleiða Apple vörur

Apple, fyrirtækið sem færir okkur iPhone, iPad og öll hin undratækin hagnaðist um 46 milljarða bandaríkjadali á síðasta fjórðungi nýliðins árs. Upphæðin nemur um 5700 milljörðum króna. Fólkið sem vinnur við að setja hlutina saman, sem þessi tæki samanstanda af, þrælar aftur á móti tímunum saman á smánarlaunum við vinnu sína. Um þetta er fjallað í fréttaskýringu sem fréttastofan CBS sjónvarpsstöðvarinnar sýndi og er birtur á vef þeirra.

Í þættinum er sagt frá því að Apple hefur gert samning við fyrirtækið Foxconn, sem staðsett er í Kína, og víðar um að framleiða vörurnar á meðan Apple sér um að þróa þær. Hjá Foxconn starfa svo hundruð þúsundir manna á smánarlaunum. CBS talar við leikarann Mike Daisey, sem fór og kynnti sér aðstæður verkafólksins árið 2010 og kynnti sér aðstæðurnar. Hann setti síðan upp einleik sem byggður er á því sem hann sá.

Daisey segir í viðtali við CBS að hann hafi séð verkafólk allt niður í tólf ára aldur. Átta tíma vinnuvaktir hafi verið sjaldgæfar. Fólkið vinni yfirleitt að minnsta kosti í tólf stundir. Raunar eru vinnuaðstæður fólks hjá Foxconn svo hrikalegar að SACOM, samtök sem berjast gegn misbeitingu á verkafólki, fullyrða að árið 2010 hafi að minnsta kosti 18 starfsmenn fyrirtækisins fyrirfarið sér í vinnunni og enn fleiri hafi gert tilraunir til þess.

Daisey vekur athygli á því að flestir telji að vörurnar sem Foxconn framleiðir fyrir Apple, og reyndar fleiri aðila eins og Microsoft, Dell og Samsung séu framleiddar í vélum. Staðreyndin sé hins vegar sú að örkubbunum í vörunum sé raðað saman í höndum og fólk verði að gera sér grein fyrir því þegar það kaupi vörurnar.



Smelltu hér til að sjá þáttinn á CBS og skoða frekari umfjöllun.